INC. AUCT. GLOSSAE.---Nubes coacto guttatim aere conglobantur. A nubibus ergo rapiuntur aquae maris, et iterum ab ipsis redduntur in terris. Sed ut esse dulces possint, in pluviis coquuntur igne solis. Alii autem dicunt, non tantummodo aquis maris nubes concrescere, sed etiam exhalatis terrae vaporibus nebulas adolescere, quibus densatis coactisque nubes altius surgere, atque iisdem labentibus pluvias effundere. Nubes autem apostoli significantur atque doctores. Pluviae ergo nubium, eloquia sunt apostolorum, quae quasi guttatim, id est, sentialiter veniunt, sed abundantius doctrinae fecunditatem infundunt.

IOAN. NOV. SCHOLIA.---Nubes coacto guttatim aere conglobantur, qui fumali levitate. Tradunt physici loca per quae imbres suspensae feruntur frigida esse per antiperistasin, qua proprietate naturae fit ut hiberno tempore putei ac subterranea loca tepeant, aestivo autem frigida sint. Igitur dum tepore solis continguntur maria, lacus et stagna, exhauriuntur vapores, et vi caloris tolluntur in sublimitatem nubium: hi propter frigus densantur in nubes, quae, humore nondum sese conglomerante, sua se vi et quadam inanitate istic sese sustinent: primum igitur propter humoris brevitatem non decidunt, ubi autem e nube congestus fit humor, propter pondus sese sustinere nequit, sed denuo ad terram fertur.